A estrutura en mencións permite ao estudantado deseñar o seu propio itinerario de materias optativas e, se o desexa, especializarse en cuarto curso en Dereito Xudicial ou en Dereito da Unión Europea e desenvolvemento sostible
A mención incorpórase ao título de graduado en Dereito cando o estudantado cursa polo menos cinco materias optativas integradas nun mesmo ámbito. O título con mención acredita fronte a terceiros a formación especializada obtida polo alumno, sen prexuízo da formación nuclear que o título garante.
Son dúas as mencións pioneiras no título de graduado que oferta a Facultade de Dereito de Ourense:
Mención en Dereito xudicial
A Mención en Dereito xudicial, máis clásica e xeneralista dentro da especialización, ofrece ao estudantado con vocación xurídica un sólido programa formativo en Dereito, que o prepara para a práctica xurídica pública ou privada en xeral. Está especialmente orientada ao estudantado que desexe dedicarse á práctica xudicial no ámbito da Administración de Xustiza ou ao exercicio profesional da avogacía.
| Materia | Cuad. |
|---|---|
| Argumentación e interpretación xurídica | 1º |
| Sistemas xurídicos contemporáneos: Dereito continental e dereito anglosaxón | 1º |
| Dereito de defensa da competencia | 1º |
| Dereito penal e procesual de menores | 2º |
| Criminoloxía e dereito penitenciario | 2º |
| Dereito de danos e responsabilidade civil | 2º |
| Prácticas externas | 2º |
Mención en Dereito da UE e desenvolvemento sostible
A Mención en Dereito da Unión Europea e desenvolvemento sostible, máis innovadora e cun enfoque supranacional, ofrece unha formación especializada e de calidade en Dereito Europeo. Resulta de especial interese para o estudantado ambicioso e sensible aos retos propios dun mundo globalizado. Tamén para o estudantado estranxeiro que desexa participar en programas de mobilidade internacional e afondar no estudo das institucións e fontes propias da Unión Europea.
| Materia | Cuad. |
|---|---|
| Dereito mercantil europeo | 1º |
| Libre circulación de traballadores e políticas sociais europeas | 1º |
| Unión Europea, constitución e medio ambiente | 1º |
| Dereito tributario da Unión Europea e internacional | 2º |
| Litigación internacional e sostibilidade | 2º |
| Prácticas externas | 2º |
Materias comúns
Materias obrigatorias para obter o título de Graduado en Dereito con ou sen Mención impartido na Facultade de Dereito.
| Materia | Curso | Cuad. |
|---|---|---|
| Xurisdicións contencioso-administrativa e social | 3º | 2º |
| Procesos especiais e métodos alternativos de solución de conflitos | 4º | 2º |
A Mención en Dereito xudicial oferta un total de 7 materias e a Mención en Dereito da UE e desenvolvemento sostible 6 materias. O estudantado deberá cursar, polo menos, un total de 5 materias (30 créditos ECTS), para a obtención da correspondente mención.
En todo caso, o estudantado poderá escoller 36 créditos de materias optativas de diferentes mencións, podendo igualmente obter o título de Grao en Dereito, pero neste caso, sen mención.