Seminario “A protección xurídica das mulleres e menores vítimas de violencia”

A Facultade de Dereito do Campus de Ourense acollerá o vindeiro 24 de novembro de 2026 o seminario “A protección xurídica das mulleres e menores vítimas de violencia. Tutela xudicial efectiva e garantías de protección”. O evento, que se celebrará en formato híbrido (presencial no Salón de Graos e en liña a través do Campus Remoto), ten como obxectivo afondar nas garantías procesuais e na tutela xudicial efectiva fronte á vitimización secundaria. A inauguración correrá a cargo do subdelegado do Goberno en Ourense, Eladio Santos; a decana do centro, Susana Álvarez; e a directora do Instituto Universitario Xustiza e Xénero, Inés Celia Iglesias.

Ao longo da xornada, destacadas expertas en dereito procesual e outras disciplinas abordarán cuestións de máxima actualidade, desde a protección das menores vítimas de violencia de xénero ata o acceso á xustiza para mulleres estranxeiras e vítimas de trata e explotación sexual. Entre as relatoras figuran a propia Inés Celia Iglesias, a profesora Ana Isabel González Fernández, a fiscal delegada de Trata de Persoas e Estranxeiría de Ourense, María Pilar Manso, e Petra Torres, da ONG Médicos do Mundo. A inscrición é gratuíta e debe formalizarse antes do 23 de novembro a través deste formulario en liña. As persoas que acrediten unha asistencia mínima do 90% e completen o cuestionario recibirán un diploma acreditativo.